世界戰雲密佈,究竟會否打仗?美國與北韓是否鐵定一戰呢?|葉一知網誌|852郵報

2017-4-15 20:56

1. 我想誰都說不準(除了燒山),歷史上的戰爭總是突如其來。但打仗前世界常會出現一些狂躁現象,依家呢個亂世,很有這種味道。

2. 有人說這是世界兩個癲佬挑起的戰爭。我覺得這個說法不公道,北韓癲咗幾多年?脫北者的經歷幾咁慘?呢個國家一早應該要被解放,但因為有共產國家撐腰,解放的代價太大,金氏一家這種世界級癲佬先可以橫行咗幾十年。金仔依家就好似,一個神經佬,冇人敢理佢,於是越來越癲,癲到開始攞刀想斬人,甚至已經買咗幾支機關槍,就更加冇乜人夠膽去制止佢、處理佢。但當有此實力嘅人出手,左翼又即刻話反戰反霸權,左膠就直頭話要包容精神病患者,佢一日未斬人同開槍一日都唔可以郁手制止佢。北韓金家就係咁樣嘅一個癲佬,Trump真係打佢,係佢真係夠薑,唔係佢癲!

3. 更加唔好忘記歷史,這個神經家族由誰養大的?本來在1950年代,北韓理應已被解放,南北韓應該已統一,但中共干預別國內政,派兵「抗美援朝」,幫北韓打南韓,等同侵略,結果就是南北韓停戰(兩國其實仍處於戰爭狀態,只是停戰),這個亞洲第一惡性腫瘤就一直肥大下去,直至今天擁有核武。

4. 大陸係北韓大佬,但金仔已經唔聽佢支笛,仲鬧大陸。今日外長王毅話:「只有對話才能解決紛爭;又警惕挑起戰爭的一方要承擔歷史責任及付出相應的代價。」呢個真係好笑,第一,你大陸民間唔係經常磨拳擦掌,話「中美必有一戰」、「解放軍短時間內便可收拾美國」云云嗎?竟然咁和平講「對話」?第二,北韓之所以變成大腫瘤,誰應承擔歷史責任?睇番第三點,咪你大陸囉!你精嘅,對於一個已唔聽你支笛嘅金仔,最好暗地送佢一程。

5. 沒有人想戰爭,我也不希望戰爭,我知戰爭會死人,甚至死好多。但每讀一本關於北韓的書,每看一套關於北韓的紀錄片,每聽到一個脫北者的自白,你都會覺得北韓裏很多人係生不如死嘅。你唔理佢?結果就去番第二點,最後你和我都可以是受害人,而且毫無反抗餘地,到時已後悔莫及,再嗟怨點解咁耐冇人去解決呢個問題。

港豬MODE:其實我買晒機票訂晒酒店下個月去日本,如果真係開戰,我諗都唔使去!

(圖片來源:Now新聞片段截圖)

所有博客及專欄文章只代表作者本人意見,並不代表本報立場。

http://www.post852.com/212537/%e4%b8%96%e7%95%8c%e6%88%b0%e9%9b%b2%e5%af%86%e4%bd%88%ef%bc%8c%e7%a9%b6%e7%ab%9f%e6%9c%83%e5%90%a6%e6%89%93%e4%bb%97%ef%bc%9f%e7%be%8e%e5%9c%8b%e8%88%87%e5%8c%97%e9%9f%93%e6%98%af%e5%90%a6%e9%90%b5/

廣告